Aurelian's Trip to Asia

Min letschtä Post

2007-10-17T10:58:00.000+02:00

Sali zäme!

Das wird min letschtä Itrag blibe befori heichum. Ich bin jetzt nach Kambodscha scho wider zrugg in Bangkok wonich einersitz mini Zäh no mache lah und andersits doch no einiges zorganisiäre han (han jetzt ungefähr ca. 35kg übergwicht.... *gg*). Naja, wird wohl es packet müese schicke für mis neue Instrument, es "Rönniet", sone art kambodschanisches Marimbafon miteme eifach bezaubernde Klang. Aber fangemer vo vorne ah....

Mis treue Bike, ändlich in gebruch

Am 4. Okt am 4i hani mini Sache packt, ufs Velo glade und bin durs dunkle Bangkok gradlet, wo doch niä schlaft. E rächt unglaublichi Reis nach Sieam Reap in Kambodscha hät agfange dasi mi schomal verirrt han wils so vill Eibahnstrasse gha hät. Nach ungefähr 10x fröge und e halb stund spöter bini ändlich am Bahnhof acho, han mis Ticket kauft und mich in Zug zwängt mitem Bike. Nach 5h Zugfahrt bini a de Gränze acho und scho vo de erschtä "Scams" bedrängt worde, wo mir händ wellä es "offiziells" Visa übertüüred atreie. De Gränzübertritt isch doch rächt easy vor sich gange und plötzlich bini inere total andere Wält gsi. Diä erschtä Idrück vo däre staubige und arme Stadt händ mich doch sehr a Indie erinnert, ähnlich arm und verwahrlost und eifach unglaublich staubig gsi. Bald bini ufes Shared Taxi gstosse, en Pickup, wo circa 20 Lüüt (oder no meh) platz finded mit jedere Mängi Gepäck. Mis Bike händs au irgendwiä no drah ghänkt und zämequäscht hämmer eus uf d'rumpelpischte gmacht. Nach 2h duregeschüttle und kein centimeter bewegä (bin eifach ufem härte Rand vom Pickup gsässe) simmer i de erschtä grössere Stadt acho woni han müese s'Taxi wächsle. Doch irgendwiä isches nüm vor sich gange, schliesslich hämmer ganzi 5h gwarted für meh Passagier( süscht wür sichs nöd lohne....) und händ eus denn im dunkle, es isch scho 8i gsi, ufgmacht - endlich. Es hät liächt afange räge....naja schutz häts a de frische luft kei gäh. Diä unglaublich schlächti ungeteerti strass hät sich au immer meh inen einzige matsch verwandled und öfters hämmer mal 20m schlüüdernd hinder eus bracht. Es isch nur no ganz langsam gange jetzt, de härt undergrund und diä dünni matschschicht obedruff hät dstrass ines einzigs schlüüderfeld verwandlet. Denn sind au scho diä erschtä laschtwäge uftaucht wo halb im Strassegrabe lige blibe sind oder anderi händ eifach aghalte. Irgendwenn isch denn gar nüt meh gange, nöd nach hine und nöd nach vorne, nur en einzige Stau. Jo mir händ denn zu 15 eusi Nacht uf de Ladefläche vom Pickup verbracht, irgendwiä über gstänge gleit und eus versuecht vor de vampirartige mugge zschütze... doch meh oder weniger erfolgslos. Bländendi ussichte wil ich gwüsst han das malaria grad es grosses Thema in Kambodscha isch....

Kambodschanischi Riisfelder zwüsched Natur

De Sunneufgang am nöchschte Morge isch höchscht willkome gsi, doch häts nüt a de Situation gändered. Diä erschtä Autos händ sich versuecht wider uf d'Strass zbringe doch e endlosi Kollone isch immer na vor ois gsi. Nach erkundigunge hani erfahre, dases nur 20km nach Sieam Reap isch, so hani sBike losgschnallt und mich uf de Sattel gschwunge. Ich bin nur extrem langsam vorwärts cho und nach 5km hät de Stau ufghört und plötzlich - erlösend- isch e asphaltiärti Strass uftaucht. Es simmer diä erschtä schuelchinder i de uniforme entgägegfahre und händ mir zuegwinkt und mich begrüesst und scho isch diä härt nacht vergässe gsi. Unglaublich tüüf blaue Himmel hät sich übere unglaubliche Scenerie uftah, so total rurals Gebiät mit Wasserbüffeltriber und Stohhütte und lüüt wo mich alli agsmiled händ (ich han ja scho rächt witzig müese usgseh ha als weschtler total dräckig ufeme Bike dur Kambodscha zfahre...). Nach de erschte Verständigungsversüech bimene Strasseverchäufer hani au scho en art nudelsuppe übercho wo zwar rächt speziell gschmöckt hät aber doch sehr guet gsi isch.

Nacheme wili händ sich diä erschtä dichterbesidlete Gebiät vo Sieam Reap zeigt und en Motorbikefahrer hät sis Tempo drossled und i de fahrt mit mir afange quatsche. Er isch de Gründer vomene Chinderhilfsprojekt und hät mich au scho grad zu sich hei iglade, um d'schuel und d'lehrer (usbildeti weisechinder) sbesichtige. Si sind extrem gaschtfründlich gsi, händ mir ufem bode en platz zum schlafe gäh und mir Riis serviärt.

Ich han bald afange Khmer zlernä und ine bi de englischufgabe ghulfe. Sässe isch extrem simple gsi (meischtens riis mit sonere art alge als gmües) doch hät sehr gschmöckt. Sieam Reap lit nur grad 6km vo Angor Wat, sgröschte Religiöse Bauwerk vo de Welt.

früehi Tempelwächterin igla inen Bricktempel

Ich han denn beschlosse, mich intensiver demit zbeschäftige und han diä nöchschte 6 Täg nur Temple studiärt, agfange mit de eltischte vo de Periode zu de klassische Angor Wat kunscht und denn post-Angkor. Jedä Tämpel hät wider en eigene Charakter gha und ich han eifach sozäge alles was irgendwiä möglich gsi isch versuecht zanalysiere, mängisch bisi es exakts 3d bild im chop gha han.

früehe unfertige (undekoriärte) Tempel

Khmer Version vo Sanskrit

imposante Face-Tower als Stadttoor

Angor Wat bi Sunneufgang

Diä vorbereitige händ denn de Bsuech vo Angor Wat sälber am 5te tag zume unglaubliche erlebniss gmacht. Ich han diä ganz grössi und kunscht vill meh chönne bewundere und ich mag de tempel eifach unglaublich.

Angor Wat, Sunneundergang

Mer chan sichs au gar nöd vorstellä wänn mer nöd deht gsi isch, isch eifach nöd möglich diä Atmosphäre. Nachd de besichtigung vo dene villne Apsaras (dänzerinne für de König vo 2000 Stück in Angor gmeissled sind) hanisi denn au mal live inere Vorfüehrig mit traditioneller kambodschanische Musig begleited gseh.

eini vo dene 2000 Apsaras in Angor Wat

Apsaras in aktion

Das hät denn au mis interesse a de musig no meh gweckt (vor de tempel händ normalerwis landmineopfer imene ensemble gspillt und em tempel e wunderbari atmospäre gschänkt) und ich han eifach gwüsst dasich no sones instrument will chaufe. Doch in Sieam Reap isch nüt gsi, ich müessti nach Pnom Penh, de Hauptstadt. So hani mini Plän churzerhand nomal gändered (han eigentlich vor gha, no chli i de gägend umezbike und no en Dschungeltempel zbsueche) und mich uf nach Pnom Penh gmacht, doch e chli truurig, mini gaschtfründliche Khmers zverlah.

Dsuech nacheme Rönniet isch es eignigs Abentüür worde und doch rächt unglaublich dases schliässlich klappt hät. Ich han nur ein einzige Tag gha um es guets zueche, zwähle und zchaufe und denn irgendwiä zversende oder nach Bangkok näh. Imene Buddhistische Tämpel bini üsserscht fründlich vones paar Mönche ufgnoh worde womer händ wellä hälfe. Mini erschtä versüecht uf de strass sind kläglich gschiitered, händ zwar alli gwüsst wases isch aber nöd womers chan chaufe. De eint Mönch hät mich zum Buddhistische Institut mitgno (wil diä musig sehr vill i de tempel gspillt wird) wo mich denn zu de Universität vo de Künscht wiitergleited hät. Durch de Rektor bini direkt zum Bauer und Liferant vo de Uni cho und han denn diä erschtä exemplar gseh. Doch er brucht mindeschtens 1 Wuche zums vorbereite..... ohgott. genau wiiteri 6h hani ziit.

Ich bin denn no en Markt go uschecke wo söllts ha und bin au fündig worde, doch diä instrument sind unglaublich schäbig gsi und keine hät irgende ahnig gha (so unglaublich verstimmt chan es instrument gar nöd sii), ich au nöd so isch en chauf nöd in frag cho. Plötzlich isch mer dIdee cho dass de Mönch chönt für mich verschicke und ich han DHL und dposcht uscheckt, doch dprise sind arg höch gsi (200US und meh für es instrument vo 400US). Am abig am 9i hanich denn doch nomal de Instrumentebauer troffe und dänkt, ja zallemer halt de happig pris, doch ich han denn es speziells wellä wo irgendwiä doch scho vorbereited gsi isch und ich chönts grad mitnäh. Perfekt, zu de Bank gradlet und am 11i hanis denn mit mir is Hotel gno.... Wow!

"Kala", hinduistische Dämon in Sandstei

Am nöchschte Morge am 6i hanich mich mit mim Bike und emene 20kg schwere und unglaublich sperrige Packet uf de Weg zrugg nach Thailand gmacht im Bus. Irgendwiä hät denn alles klappt über dGränze (obwohls mi wider versuecht händ zverarsche...) und am abig bini zrugg in Bangkok acho.

Wiä scho im letschtä Post bini am 22. Oktober zrugg, chum am 6.10 in Zürich ah mitem Flug LX183 vo Bangkok und wär natürlich schön wänn de eint oder ander ziit hät zcho :)

Gecko imene Tempel

Rückblick

2007-10-03T07:24:00.000+02:00

Oh wunder, ich hans doch no gschafft mit de Bilder! :) Defür gits umso meh, diä älteschte sind immer no vo Ladakh afangs August.

De Stok Kangri, 6254m

Ich han per zuefall (naja...würkli zuefall? so langsam fangi ah zwifle) min alte Trekking kumpel Hanno wider troffe und mir händ beschlosse zäme mitem Christian als Abschluss nomal en 6000er zbestige. De ganz Trek hät 4 Täg dured und isch eifach en perfekte Schluss gsi, sozäge de Höhepunkt. Mir sind wider ohni Füehrer loszoge und am 2te Tag bim Advanced Base Camp acho. Achja oises Ziel isch de Stok Kangri, 62514m. Jedä hät au wider ca 12kg ufem rugge gh, zum glück hämmer das bim ufstig zum Gipfel chönne im BC lah. Am 2 am morge simmer ufbroche, nach churzem und schlächtem schlaf uf 5400m und es hät eifach gschneit. Zwei anderi Gruppe mit Füehrer sind scho vorus gsi und so hämmer beschlose, ihn in agriff znäh.

Bim ufstig über de Gletscher

Nachere Gletscherüberquärig isches es steils Schneefeld de Oschtwand duruf, was doch rächt härt gsi isch, mit scho durchnässte Händsche und extrem chalte Temperature. De schnee hät fortgsetzt und de letscht Teil eme steile Grat über Fels erschwärt, jedä Tritt hät müese überprüeft werdä wills bedeckt vo schnee gsi isch und extrem glatt. Nach 4h erschwertem schnuufe ischer plötzlich vor eus ufem Näbel uftaucht, de lang ersehnti Gipfel.

De lang ersehnti Gipfel im Näbel

Was für es Gfühl... doch gseh hämmer nöd vill. Nach 5 minute häts denn aber doch chli ufgrisse gäge Süded und mir händ eus ufem top of the world gfühlt. ;-) Em Schnee zum Dank häts nur na ei anderi Gruppe gschafft und so hämmers rächt friedlich gha ufem Gipfel, süscht sind normalerwis 5 Gruppe pro Tag. De Abstieg isch schnell vor sich gange, mir händ aber denn nomal im Basecamp übernachtet will de Christian doch denn no chli Höhechrank worde isch. Mis chnüü isch zum glück immer na beschtens zwäg gsi und hät au de letschti Tag unbeschädigt überstande.

Hanno und Christian

Am letschtä Tag isch de Dalai Lama nach Ladakh cho, doch leider hani sini Teachings verpasst, ich hanen nur gseh verbihfahre.

Ladakhi Fraue wo uf de Dalai Lama warted

Churz druf bini denn au scho wider über diä fantastischi Bergwelt em guete alte Indie entgägegfloge, wo eus dFüechtigkeit und Dhitz vom Monsoon wider fescht im Griff gha händ. Nacheme letschtä Tag in Delhi (doch chli truurig das unglaubliche Land zverlah) bini nach Bangkok gfloge. Wow.

Bangkok Downtown

Was füren schock, so modern und suber. Und wiä all Girls agleit sind min churze hose und tops, wiä dmentalität so total anders isch. Ich hans doch gnosse, wider mal inen Club zgah (hät gueteDrum n Bass gha) und han au no en Kolleg us Indie widertroffe, de Ian.

Thai Girls

Mir händ eus släbe mit Shisharauche, Firesticktraining und guetem Thai Food versüesst. Nach es paar Täg hani denn au na es Bike gfunde und kauft und nach 10 Täg (eigentlich vill zvill in Bangkok) bini denn endlich ufbroche, top usgrüschtet für 2 Mönät Laos und Kambodscha mitem Bike.

Firestaff Training

Doch scho mis erschtä Tagesziel, Ayutthaya, 80km nördlich vo Bangkok, hani nöd erreicht wil mis chnüü wider agfange hät zschmerzä. Ich han denn ame ruhige seeli zwüsched riisfälder camped bis mich es unglaublichs starchs Monsuungwitter überrascht hät und mini hängematte und mich total durchnasst hät. Naja sischlafe isch denn chli schwirig worde. Am nöchschte Morge hani denn au Ayutthaya erreicht (ehemaligi Hauptstadt vom Siam-Königrich) und 101 Tämpel agluegt.

Ayutthaya Temples and Buddhas

Doch zum fortsetzä per Bike isch nöd drah zdänke gsi, so bini zrugg nach Bangkok, hans deht deponiärt und mich per Zug und Bus nach Laos ufgmacht, wasi nach es par Täg in Nordoschtthailand als zwüschestation denn au erreicht han.

Laotische Baustelle

D'hauptstadt hät denn au scho en super idruck gmacht, han no niä sone ruhigi Hauptstadt gseh mit praktisch 0 Verchehr. Gueti französischi Bäckereie häts au no us de Kolonialziit und mit 100Dollar isch mer grad Millionair in Kip. Ich han en superfründliche Mönch kännerglernt womi echli i de Stadt umegfüehrt hät (im Bild).

Nach einere Nacht bini denn au scho im Bus nach Vang Vieng, em sogenannte Backpackerparadies vos Laos acho (was aber eme backpacker nüme würkli entspricht, scho zu touristisch mit "Friends" in jedem verdammte Restaurant am laufe....

Doch dlocation isch perfekt zum Tube ufem Fluss, imposanti Sandsteifelsä zwüsched de übergrüene Vegetaion und Riisfelder vo Laos hervorrage. Das isch eifach de perfekt kontrascht nachem de Wüeschti Ladakh, Laos isch eifach supergrüen, unvorstellbar grüen alles und überall, mit 80% no primärem Wald bedeckt.

Das grüene Paradies

Isch au sehr arm, doch würklich gseh tuet mer das nöd, und dlüüt sind sehr fründlich. Miteme Iranische Biker wo 5 Jahr um dWält biked bini ufen 2 Tages Trek dur Riisfälder und Dschungel, eifach wohii de weg eus füehrt.

Eine vo de ville Chäfer wo eifach üüüberal sind

Mir händ müese wackligi Brugge überquere, usem labyrintische Riisfelder usefinde und Bach überquerä. Nachdem isch au de Ian acho miteme Kolleg und mir händs eus ufem Fluss bequem gmacht wo berüehmt isch für Tubing, Bare a de ufer und gigantischi Ropeswings is Wasser.

Boatrace in Luang Prabang

Nachane hani churz halt in Luang Prabang gmacht, de zweit gröschte aber au sehr relaxte Stadt, sehr komfortabel für Tourischte mit vill Kultur und alternative Shops und Bars. Glücklicherwis händ au grad dboat races agfange, 50 Ruedere i dene sehr lange aber soo schmale und liächte boot, wo perfekt im Takt es erstunlichs Tempo anebringed.

Spiegelige im Wasser ufeme Trek

Nachane bini no wiiter in Norde für Trekking (ja scho wider, ich chum nöd gnueg über .... :-) im Dschungel ime National Park.

Mir händ au es Akkha Village bsuecht, doch das isch irgendwiä komisch gsi, sind eifach au scho zvill Gruppe vorane zu dem Dorf (obwohl de Trek sehr neu isch und sganze Gebiät). Trotzdem sinds 2 wunderbari Täg im Dschungel gsi, mir händ mal e King Kobra gsichtet und sind vo Bluetegel abgsoge worde. Ich liäb das grüen, das Läbe im Dschungel.

"Burn and Slash" Riisfelder vo Tribes

Vo anderne Travellers hani irgendwas vome Gibbons experience ufgschnappt, was au 3 Täg im Dschungel isch, doch mehr wohnt in Baumhütte, höch überem Dschungel,

Rampe für de Start vom zipping

zmitzt imene Gebiät wos einigi Gibbonfamiliä git und fortbewege tuet mer sich durch Stahlseil, vomer miteme Chlättergurt undere Rolle drah befeschtigt isch und bis zu 150m höhi und 500m längi über de Dschungel surrt..... unglaublich.

Carlos us Mexico am zippe

Es sind 3 fantastischi Täg worde, sich vo eim Baumhuus zum andere zippe und das Gebiät uf eigeni fuscht zerkunde. Gibbons hämmer sehr nöch ghört aber leider nöd gseh.

Sunneundergang vome Baumhuus us

Im Norde nur 2km vo de Chinesische Gränze entfernt bini no 2 Täg go tribal villages aluege.

Tribes

Am 18. September bini us Laos und direkt nach Bangkok zrugg, um en 10 tägige buddhistische Meditationskurs zbsueche, was absolut unglaublich gsi isch, aber wens interessiärt söll mich doch am beschtä sälber fröge, bringt nüt darüber zschribe. Jetzt bini in Bangkok und morn am Morge ufem Weg nach Kambodscha, wider mitem Bike. Ich wird mini letschtä beide Wuche um Angkor Wat verbringe und denn am 22. Oktober am Morge am 6.10 in Züri acho.

Bis dahin alles gueti zrug id Schwiz und ich freu mich sehr eu bald wider zgseh!

Chnueproblem.....

2007-08-23T06:54:00.000+02:00

Thjo, ich bin scho wider zrugg in Bangkok. Nach de erschte 80km haet mer mis chnue wider afange zschmerzae, ich han diae ganz unternehmig muese stoppe nacheme arztbsuech.... scheisse!! pisst mi voll ah, de diae erschte beide Taeg sind eifach zu geil gsi...

Ich versuechs halt wider zverchaufe oder suescht nimis zrugg id schwiz. Mueni mi halt wider zu de normale Backpackers herunterlah und mit bus und zug reise...

wiiteres ines paar taeg (oder wuche, mer weis niae...)

Heading for Laos

2007-08-17T13:54:00.000+02:00

Yo ich han grad gmaerkt dasi dkamera im hotel vergaesse han... pictures und en usfuerliche bricht chunt demfall spoeter. Ich han am 8. Aug Leh verlah und bin ueber Delhi nach Bangkok gfloge. De Kulturshock isch riesig gsi, so suber und modern alles, greglete verchehr und so vill huebschi Thai Girls... (obwohl Bangkok als e Stadt mit vill Verkehr und schlaechter Luft gilt). Ich bin jedefalls da chli haengeblibe, han einiges a luuet troffe und mir es Bike zuetah, mitem ich mich morn i de frueh uf nach Laos und Kambodscha mache. Ich han vor, no oeppe 1.5 moenet deht zverbringe und am schluss no e wuche zwei ame Strand in Thailand zrelaxe und zchlaettere. Vorussichtlich chumi am 21. Oktober zrugg.

Snoegscht mal gits meh...

Der "höchscht" Pass vo de Welt, Flashfloods, en Hitzeschlag und Party

2007-07-31T10:24:00.000+02:00

Salüü mitenand!

Jo, sitem letschtä mal woni mi gmälded han isch scho wider so vil passiärt... Zrugg in Leh hani voll interessanti lüüt, en Brit und es australisches Pärli känneglernt. Mir händ eus im jongliäre und Firestick spine trainiärt, hoch über Leh, im Rugge Gebetsflagge. Nach es paar Täg hämmer entschide, mitem Bike de "höchschti " befahrbarni Pass vo de Wält zerkämpfe (obs würkli de höchscht isch weisi nöd...). D'Passstrass füehrt über 40km vo 3500 uf 5600, wäg de schlächte Trucks nöd sehr steil aber ständig. So hämmer eus mit für indischi verhältniss sehr guete Bikes am Morge am 5i uf de Wäg gmacht. Nach 10 Stund lide händs denn de eint Kolleg (im Bild grad diä letschtä Meter) und ich gschafft, de ander hät müese kapituliäre diä letschtä 10km. D'Abfahrt isch eifach nur zu geil gsi, zerscht 10km über e holperstrass und Bäch, nachane total guet, sodass mir en ganze Militärkonvoi überholt händ. Nach 1.5h simmer denn au rächt abkämpt zrugg in Leh acho.

Dave

Ich han denn no en 28jährige Ami(Dave) troffe wo au offe gsi isch füren Trek, selber organisiärt und gfüehrt und zwei Israelis sind denn au no mitcho. De Trek, am Afang häter nöd so schwirig usgseh, hät sich den als üsserscht abentüürlich usegstellt. Es hät agfange, das am Morge vo de Abfahrt mitem Bus de eint gmerkt hät, dass de Chocher nöd funktioniärt. So hämmer de einzig Bus am Tag verpasst und sinden go repariäte, händ s'Benzin ustuscht und dänn versuecht z'hitchhike. Nach 3h über de Mittag in praller Sunne hät eus denn ändlich eine mitgno, leider nöd bis zum Zil. Szweite Mal isches denn au scho eifacher gsi, und endlich simmer am Afang vom Trekk acho. De Ami und ich händ schwer zträge gha, bestimmt über 15kg, doch d'Landschaft hät das wider wett gmacht, wo eifach phantastisch isch. De eint Israeli hät leider sini Kamera ime Dorf verlore. Am nöchschte Tag isches über de erscht Pass, 5000m, was einiges meh asträngig koschted hät als ohni Rucksack sletscht Mal (im Bild diä letschtä 50m, es isch wiä es neugeborewerde gsi).

De nöchscht Tag hämmer e Pause igleigt (Shabat für d'Israelis *gg*) und es de Tag mit Steimannli baue und Chartespile vertribe. Am Namitag häts s'erscht mal Afange rägne, üsserscht lang für diä dortige verhältniss am Stück (Im Bild rechts: churz vorem Rägne, päch schwarzi Wulche, Bild Links diä beide Israelis im Nasse Zelt). Nach 3h hämmer usegfunde das s'einte Zält nöd wasserdicht isch, es hät eifach überall gleckt. Nach wiitere drü stund (es isch 21:00 gsi), hämmers denn scho langsam komisch gfunde, dases immer no rägned und eus überleit, chli wiiter weg vom Bachbett eusi zält ufzstellä, doch mir sind denn zfuul gsi und händ eus nöd chönne vorstellä, das de Bach so wiit astigt. Am 3 i de Nacht hät eus denn de Kolleg gweckt und gfunde, de Bach gsächi chli bedrohlich us, mir sötted eus bewegä. Schlaftrunke hanis im nöd so würkli wellä glaube, han denn aber ganz wenig wasser im Zält bemerkt. Naja, nachere Minute spöter hät sich denn en Strom durch de Flügefänger is Zelt ergosse und eus pitschnass gmacht, s'Adrenalin isch durch eusi Adere und mir händ eus so schnell wiä möglich a'd evakuiärig gmacht. Eifach überall rund ums Zält sind jetzt chlineri und grösseri Ström gflosse, nachere heikle überquerig vom Hauptstrom hämmer eus denn in Sicherheit bracht. Resultat: Nassi chleider, nasse Schlafsack, chalt und 3 am Morge, 3h vom nöchschte Dorf entfernt.

Mir händ denn en total üble Chai trunke, es hät nur so gsanded zwüsched eusne Zäh wil de Bach so dräckig gsi isch. Zum Glück isches nöd soo chalt gsi dases zunere ernschthafte bedrohig worde wär, mir händ eus denn bald ufgmacht zum eus warmbhalte. Nach villne schwirige Bachüberquerige (es hät eifach zuvill Wasser gha jetzt), hämmers denn endlich is Dorf gschafft und alles trochnet und eus erhollt. Schwein gha und e lektion glernt....

Doch de letscht Pass hät au no was zur überraschig bote. De Weg hät es am nöchschte Tag rächt nidrig uf 4000m durch engi Schluchte gfüehrt, mir händ gschwitzt wiä diä blöde mitem Rucksack. (Im Bild Links: kriminelli Brug über diä schlucht mi Dave). Womer bim Dorf zum übernachte acho sind, jedä mit 10 Minute abstand, hämmer eus denn langsam afange sorge mache, wo de letscht Israeli nach 20 Minute immer nonig erschine isch, mir händen churz vorane no gseh. Dave hät sich denn uf de Weg gmacht, ihn zsueche. Er häten denn gfunde, de Israeli nöd würkli in bewusstsi, eus suechend und umeirrend, total dehydriärt und eventuell miteme Hitzeschlag. Zum glück häters no bis zum Dorf gschafft mit Daves Hilf, mir händem Rehydrationssalz ghä und en huufe Wasser. In sim Rucksack hämmer 1.5l Wasser gfunde, das heisst, er hät de ganzi Tag (5h Trekkä) nur en halbe Liter Wasser trunke!! De ganz abig ischer i de Gerschtefälder umetrippt, hät eus nöd würkli wahrgno und wirri Sache gredt. Vill ischer taumled und umgheit, mir händen nöd immer chönne rettä, hät a euses Zält pisst und hät plötzlich angscht übercho mir werded ihn miteme Skalpell bedrohe :O. Diä nöchscht Strass isch zu wiit weg gsi mit 2h, unnerreichtbar de abig mit ihm so schwach, so hämmer nüt anders chöne mache als ihn versueche z'beruhige (was nöd eifach gsi isch). Am nöchschte Tag häter scho wider fitter usgseh und mir händ au d'Strass erreicht, en Jeep isch natürlich (ja mir sind immer no in Indie *gg*) scho bereitgstande und hät eus nach Leh mitgno, wo mer ihn inen Spital iglifered händ. Diä händ au nöd vill meh gmacht als mir scho, nach 2 Täg ischer denn wider voll uf de Bei gsi.

Zwei Täg spöter hämer eus zu nünt entschlosse, 2 Nächt anen extrem schöne See zfahre (direkt a de indisch-tibetische Gränze) und zcampe. Ich han d'ghlägeheit gnutzt und mich ufs Velo gsattled, das Mal mitere no grössere herusforderig als sletscht Mal. Das mal sinds 150km (statt 80) und insgesamt 2300 Höhemeter gsi, überen Pass vo 5400. Am Afang isches ganz guet gange, diä erscht 40km im FLache rächt schnäll zrugg gleit und mich denn an Ufstig vom Pass gmacht. (Photo Links: Zwei überus fründlichi ladakhi Strassearbeiterinne womich zu Tee und Snack iglade händ). Doch mich hät nöd mini Kondition gstoppt, nach de erschtä 1000m händ mini beide Chnüü afange schmerzä, so fescht das anes wiiterfahre nüme drah zdänke gsi isch. Das hät mi doch rächt möge, mini Ziil nöd zerreiche. Nach 10 Minute isch de Jeep mit de andere grad rächtziitig acho und so bini mit ihne mitgfahre. Thjo, villicht snöchscht Mal, ich chans mer jedefall imer no vorstellä das z'schaffe.

Jetzt bini wider in Leh, vorgeschter wider mal anere Party gsi (Psy). Isch zwar cool gsi wider mal ztanze nach so langer ziit, doch so würkli gnüsse hanis nöd chöne, de DJ isch eifach unglaublich schlecht gsi (all 2-3min Trackwechsel, eifach de letscht Track gstoppt und de nöchscht laufe lah.....tztztz). Ich mach villicht doch nomal en Berg, han grad min alte Trekkingkumpel Hanno wider troffe, am 7. Aug isch min Flug zrugg nach Delhi und denn gahts nach Bangkok für Laos und Kambodscha für diä letschtä beide Mönät...

Fruchtverkaufer in Leh

2007-07-11T06:51:00.000+02:00

Hallo zäme!

Scho wider mäld ich mich, wider mit vill fotene und em Bricht vo mim zweite Trek, wo au wider voll schön und abentürlich gsi isch. Dasmal simmer no szweit gsi, de Hanno und ich und no en Ponyman, wo glichzitig Füehrer, Choch und Helper gsi isch. De Trek hät eus in 10 Tag zu zwei See gfüehrt, über usdehnti Hochebene und schliesslich über en Pass vo 5840 Höhemeter. De ganz Trek isch über 4500 gsi, meischtens hämmer au über 5000m übernachtet und händ eus drum beschtens akklimatisiärt. Diä erschte beide Täg isches gemähchlich zur Sach gange, nur über ein Pass. Euse Guide hät super kocht und eus diä ganz ziit mit Chai versorgt. Am zweite Tag hani mi no allei ufgmacht ufen grössere Hügel vo 5600 wili no zvill energie gha han, ich bin mitere traumhafte ussicht belohnt worde. Am nöchschte Tag häts afange Hagle, Schneie und rägne für e gueti Stund, mir händ eus de Region vom erschtä See gnöchered. Das isch dert a de Tagesornig wäg de grosse Hitz wo entstaht i de Ebeni. Dört simmer au serscht mal wider uf zivilisation gstosse.
De Ladakhi wo da vor sim Zält hocked, sortiärt grad diä saumässig tüür Paschmina wulle, dezue Beedie rauchend (ganz billigi indische Zigarette, eigentlich nur es grollts Tabakblatt). Englisch häter leider nöd chönne.
De erscht see vome Hügel womer am 4te Tag bestige händ, ufem Gipfel häts eus fascht devo gwinded und verhagled simer au wider worde bim abstieg.
Wieder mal es foti vo mir, meditiärend im grüene gras *gg*. Am sunne tanke für diä ischalte nächt. D'temperaturunterschied sind eifach gwaltig da, am tag chas easy 20 Grad werdä, au uf 5500 no, noch wirds wulchig, mer schwitz und isch nass isches grad ischalt. Mer seit, wänn eis Körperteil i de Sunne isch und es anders im schatte chammer sunnebrand und erfrürig glichzitig hole.
De Ufstig zume langstrecktä, nöd so höche Pass. Es isch en einzige Bluemegarte gsi. Das isch sowieso erstunlich, isch zwar wüeschti, hät aber blueme bis uf ca. 5600m.
Nacheme easy tag hämers camp uf 5100 gha und beschlosse, no en benachbarte 6000er zmache, de erscht vom Hanno und mir! Isch dank gueter akklimatiosation ganz guet gloffe, aber diä letschtä 300m über es langstrecks steils gröllfeld womer immer wider abgrutscht isch, isch voll härt gsi. S'Foto isch vom erschtä Steimannli uf dem Berg wonich baut han ;)
Nach 7 Täg simmer den bim 2te See acho, was eifach voll verruckt isch da wiämer am foto chan agse. Total klar de See und ischalt, mir händ eus aber trotzdem mal müese wäsche nach dene 8 Tàg und sind inegsprunge.
Am 8te Tag hani urplötzlich chnüüproblem übercho bime abstieg. De ziitpunkt isch rächt ungünschtig cho wils am nöchschte Tag über de höchscht Pass gange isch, 5800. Ich hans drum mit Medikament gäg Prellige und so versuecht unds au ibandagiärt, doch de Schuss isch nach hine use, d'näbewürkige händ mir i dere höchi meh Problem verursacht als diä eigentliche Symptom, ich han voll Mageverstimmig übercho (und au na Bluet gschisse... isch nöd so ermuetigend gsi) und mit totaler erschöpfig hanich mich denn i 4 stund de Pass ufekämpft. Ich han glaubt ich wirds nöd schaffe.
Es Yak vonere ganze Yakherde, womer bim ufstig gseh händ.

Gipfelfoti vom 5800er Pass miteme gweih vome Blue Sheep. Euse fuehrer hät nöd möge uf mich warte und hät sich schomal an abstig gmacht. Blöderwis hämmeren denn im Tal nüm gfunder, sin 5 km wiit no gloffe i siitetäler wos no wasser gha hät, aber kei spur vonem. Mir händ nur en chline Tagesrucksack mit wenig chleider debii gha und händ eus drum uf e härti Nacht schomal mental vorbereitet, eventuell mitere Nachtwanderig diä letschtä 30km bis zum Ziel. Plötzlich isch volls abentürfeeling ufcho...Doch zum Glück hät er eus denn gfunde, Foti isch ufem weg zum Lager.

Am nöchschte Tag hämmer noni gwüsst über diä 30km in einem oder zwei Täg mached, sind eifach mal gstarted. Nach de erschtä 10km häts afange Schneerägne bi ca 3 Grad, De FLuss isch plötzlich agstige womer no ca. 20 mal werded quere müese und zu gueter letscht hät mis chnüü au wider afange schmerzä. De Räge hät nöd wellä stoppe, mir händ eus nassi schue zuezoge wägem fluss und de räge hät eusi chleider durchnässt, es isch ischalt gsi und immer no so wiit. Diä 20km sind mini längschte vo mim läbe gsi, ich han mich mit mim chnüü schritt um schritt vorwärts kämpft, mit halb erfrohrene händ und füess. Nach 7h simmer endlich am zielort acho, en heftige Chuenagel häts bi allne gäh womer eus ufgwärmt händ. Aber total froh simer gsi das mers gschafft händ. Am nöchschte Tag isches ime Dieseltruck in 10h zrugg nach Leh gange wo mich mitgno hät. D'fahrt isch nöd grad so sagnähmschte gsi, aber endlich zrugg in Leh bin ich am regeneriäre und d'ahnehmlichkeite vo guetem ässe und gsellschaft am gnüsse.

Ladakh Trekking

2007-06-28T09:45:00.000+02:00

Salü ihr liäbe!

Nach Varanasi hani eigentlich wellä nach Rajastan, dem Indie, womer sich so vorstellt. Doch leider häts rächt härti Ufständ gäh, 20 Demonstrante sind vo de Polizei erschosse worde und min Zug isch cancelt gsi plötzlich. Wenigschtens hani in Delhi mini Kamera chönne repariäre, ich bin eifach extrem happy!

Ich han mich denn i richtig Himalayas ufgmacht, de Mordshitz vom Flachland entfliehend. Ame super chline Ort hät mer chöne River Rafte ime rächt riiesende FLuss (bis Stufe 5), was ich natürlich grad han müse usprobiäre, und am abig zum relaxe häts au no heissi Schwäfelbeder gha.

Nachdem bini uf Manali, so nach Goa öppem 2-tourischtische Ort vo Indie, wos Marjuana eifach überall am Strasserand und uf Felder wachst. Deht hani mini erschte Erfahrige mitem Paragliding gmacht. Wils mer so guet gfallte hät machi villicht spöter no e eiwüchigi usbildig zum sälber Flüge. En alte Kolleg woni scho mitem zämegreist bin in Hampi hani deht widertroffe, mir händs so richtigt krache lah ;) Er isch au drummer, so hämmer eifach überall spontani Jam-Sessions gstarted will beidi so spitz uf Musig gsi sind.

Nach dem hani mich in 2 Täg Busfahrt uf nach Ladakh gmacht, über en Pass vo 5400m, de zweithöchst befahrbare Strass vo de Welt. Zum GLück isch d'Landschaft so unglaublich abwächsligsricht gsi süscht hetti diä Tortur glaub nöd usghalte. Ladakh lit sehr höch, Täler durchschnittlich 3500m und denn gahts ueh bis uf 6800. Es isch e Hochebeni, wo eigentlich zum tibetische Plateau ghört. Dkultur isch au extrem tibetisch prägt, will Tibeter sind nach Ladakh gflüchted und jetzt chunt mer in Ladakh meh vo de tibetische Kultur über als in Tibet sälber wil d'CHinese alles zerstört händ. Dmäncsche läbed extrem eifach, isch au eis vo de spärlichscht besidelte Gebiät vo de Wält, wüeschteähnlich mit nur wenig Wasser i de Täler. Das machst aber au so bsunders, de stark Kontrascht vo de grau-bunte Landschafte zu de hypergrüene Täler, überall verstreut sind Gompas (chlöschter) und Pagode, diä eifach perfekt id Landschaft passed.

In Ladakh hani denn au min Trekkingpartner troffe, mir händ eus über Internet kontaktiärt. Er isch dütsch, 37 und super druf, mir händ eus grad verstande. (Was nöd sälbstverständlich isch nur über Internet). Nach 2 Täg in Leh (de Hauptstadt) zur Akklimatisation uf 3500m isches denn au scho los gange. Eus hät sich denn au no e dütschi Geologiestudentin agschlosse, was sich i dere Landschaft super troffe hät. Mir händ beschlosse, en 8-Tages Trek zmache, en rächt populäre zwar aber wil mer so früeh gsi sind häts na kei Lüt gha. S'ässe und alles hämmer sälber gschleppt, isch denn scho ganz schön schwär worde.

Am erschtä Tag simmer au grad uf 4500 zum übernachte. Es isch isig chalt gsi, ich bin liächt Höhechrank worde und am morge sind 10cm Schnee gläge. De Weg hät eus denn über de erscht Pass vo 4900 gfüehrt, wos nachane wider i di sunnige Täler gange isch bini au scho wider fitt gsi. Mir händ i dere wüeschteähnliche Landschaft extrem vill Tiär gseh, Murmeltiär z.B. wo eifach kei Angscht vor Mänsche gha händ und mir bis uf 10m händ eus chöne nöchere, aber au Adler, Steiböck und Yaks. Nach de erschte Täg hät mer sich langsam an schwäre Rucksack und de Schmerze gwöhnt und es isch so richtig schön worde, jedä Tag 8h laufe und süscht eigentlich nur na esse und schlafe. Blöderwis binich vorem letschtä grosse Pass no chrank worde, ich han mich denn diä 1500m müese ufequäle mit jedäm schritt, was denn churz vorem Pass extrem asträngend worde isch uf 5150m mitem Rucksack undem gschwächte Körper. Trotzdem isches irgendwiä e gueti Erfahrig gsi, mal so am Limit z'sii. Nach 2 Tàg abstig simmer denn au scho in Hemis acho, em End vom Trekk, grad rächtzigig zum gröschte Chloschterfestival vo Ladakh. Isch sehr idrücklich gsi, nur blöd dass 80% Touris gha hät, vill so möchtegernprofifotografe mit riese Kamera vorm Gsicht wo sich total penetrant immer zwüsched diä tanzende gstellt händ - müehsam.

Nach 2 Täg bini au wider regeneriärt und für de nöchscht Trekk bereit womer in 2h starte werded. Das mal sinds 11Täg, aber mit Pony undeme Guide. Jetzt gahts au voll id Wildnis wos überhaupt nüt meh hät (ah doch, es paar Nomade vo Kaschmirwule produziäred, wäg dem steirich sind aber immer no läbed wiä immer ;=).
Süscht gahts mer immer no superguet, und etz ändlich eine vo mine Träum am verwürkliche. Ich gnüsses eifach immer no so frei zsii, obwohl mich mängisch en wehmüetige Gedanke au id Schwiiz füehrt.

Varanasi

2007-05-28T05:10:00.000+02:00

Jo da bini wider, das mal vo Varanasi, eini vo de heiligschte Stedt vo de Wält!

Nach dem ich in Chennai in Indie vo Sri Lanka acho bin, hani no en churze bsuech binere französische Jus-Studentin gmacht woni scho vorane troffe han und bin denn in 3 Täg mitem Zug miteme churze Stop in Kalkutta durch halb Indie gfahre...mer gwöhnt sich a alles. Ich bin nöd vergifted worde (isch au scho vorcho, um s'gepäck zchlaue) und di indische Verchehrsmittel sind eigentlich ganz guet, au wen nöd immer diä schnällschte.

Varanasi isch eifach total beidruckend. Ich würd si als di verüktischti Stadt vo de Welt bezeichne. Si isch eini vo de hygienisch problematischte in Indie, jedä Touri hät Problem mitem Mage. Millione vo Pilger chömmerd jedäs Jahr um es Bad im heilige Ganges znäh , und villi chömmed da ane um zu stärbe. Mer glangt direkt is Nirvana wänn mer da stirbt, sini Leich direkt am Ganges verbrännt wird und denn d'Äsche am Ganges übergäh wird. Thjo, das füehrt dezue das überall Leiche verbrännt werded am Ganges, 10m denäbed baded hunderti vo Inder und ab und zue taucht e Leich im Wasser uf nachdem si 20Täg ufem Grund verbracht hät... isch scho chli komisches Gfühl gsi (nöd verbrännt... heiligi Hindus werdäd direkt am Ganges übergäh...). Sie isch au extrem touristisch diä Stadt mit allne mögliche Tourifänger überall, sie isch e Stadt vo de Künscht (mit 2000 usländische Studente a de Universität) vo Stira de traditionelle indische Gitare, Yoga, Tanz, Hindi-Kürs bis zu Banetthi, e indischi Kampfkunscht. D'stadt isch unglaublich malerisch mit hunderte vo chline Gasse, uralte Gebäude und en huufe Mänsche überall. Släbe spillt sich i dene Gasse ab, mer fühlt sich 200 Jahr zruggversetz wänn mer durelauft.

Ich han diä letschtä beide Wuche demit verbracht Tabla, e indischi Trummle, zlernä. E extrem technischi aglägeheit, es git zum bispil 29 verschideni Kläng won mer chan produziäre. Ich üeb zwar 4h pro Tag aber 2 Wuche sind nüt für es Instrument, drum hani entschide eini zchaufe und heizschicke.

De Sunneundergang uf de Tächer zverbringe isch s'bescht, de Chinde bim Spille zuezluege, d'Vätere lönd Drache stige (ab und zue häts über 100 Drache gha), d'Affe sind am umeturne und d'Stadt isch ines dunschtigs Zwilicht taucht, Glogge bimmled vom Ganges ueh und s'huupe chan mer au lislig ghöre.

Thjo ines par Täg machi mich uf nach Rajastan id wüeschti.... leider no heisser als da. Und da hämmer scho 45 Grad am Tag.... isch uszhalte aber scho härt.

Foti hani leider kei... mini Kamera isch immer nonig repariärt, ich han defür versuecht, mini Schilderige desto usfüehrlicher zhalte...

Zurück nach Indien

2007-05-09T13:52:00.000+02:00

Jo mini Ziit da in Sri Lanka isch au scho wider verbii. Abgseh vom Terrorismus isches es wunderbars Land zum bereise, hät extrem vill zbüüte für jedä Gschmack. Nach mine erschtä Surfversüech hani in 3 Täg diä wichtigschte kulturelle Stett aglueget, ganzi 3 UNESCO Wältkulturerbeplätz sind drunder gsi. Es hät au würkli es paar ganz spezielli Plätz drunder gha wiä zum bispil en alte buddhistische Tempel zmits im Urwald amene Berg, ich bin de einzig tourischt diä ganz ziit gsi, han eifach d'stilli gnosse (respektiv em lärm vo allne vögle, affe und wiitere urwaldbewohner glauscht) und diä alte Ruine uf mich würke lah. Au toll gsi isch de riese Fels, drunder und druf e riesigi feschtig Baut, platz für 10'000 lüüt und 500 konkubine (ja de könig hät gwüsst wiä läbe...*g*).

Nachdem hanis glück gha das mich en tamilische Familievater, wonich ime Bus troffe han, zu sich und sinere Familie hei iglade hät. Er wohnt inmitte vo Teeplantage uf ca. 1500m, hät e extrem netti Familie, si händ eifach alles gmacht für mich (ich bin sozäge gmäschted worde...*g*) und sind au paar hübschi jungi Dame deht gsi. S'einzige wo diä aber wellä händ isch "marriage" gsi....leider ;)

Nachdem hani de heiligscht Berg vo de Wält erklomme, Adams Peak wo ganzi 4 Religione verträte sind und wo en übermänschliche Fuessabruck im Fels für sich beaspruched. De Sunneufgang isch de hammer gsi, und jedi Religion hät währendesse zeremonie verastaltet.

Jedä Morge hani was unternoh. Bin no ime Nationalpark gsi wos eine vo de ältischte Urwälder vo de Welt hät. Hät au würklich usgseh wiä eine vo de Wälder wo im Lord of the Rings vorchömed. Jedä Namitag hani de Ort gwächsled, und es hät jedä namitag gosse wiä us chüble.

Am schluss bini nomal für es paar Täg gsurfed, han Flugtickets bueched, Papierchram vom Sägelschiff erlediged und s'guete ässe i dem tourischteort Unawatuna gnosse. Ich bin am schluss doch rächt erfolgrich gsi bim Surfe, han miteme churze Board immer wider mal e wälle verwütscht und für 20m gsurfed - es geils gfühl!

Leider häts no meh Problem mit de Kamera gäh, d'Mechanik vo de Linse funktioniert nüm, ich muen si uf Singapor schicke... :( Ich häng rächt a minere Kamera, si schüsst würkli tolli Bilder.

Mir gahts süscht super, han so nach 4 Mönät scho chli heiweh ab und zue, aber jedä Tag neui Sache z'erläbe kompensiärt das locker!

Grüess us Colombo, Sri Lanka

Rückblick - endlich Pictures!

2007-04-24T12:04:00.000+02:00

	Endlich hanis gschafft, Fotis uezlade. Ei ganzi DVD hanich scho heigschickt (drum kei Fotis meh verfüegbar) und wiiteri 2GB hani verlore, doch ich han eifach mal es paar ufeglade. Thjo wo sölli afange? So wiän ich mich no chan erinnere hanichmis letschtä Mail irgendwo vo Goa us gschribe. Nach Goa bini uf Hampi, es rächt chlises defür umso heiligers Stettli im Härze vo Indie, umgäh vo riesige Steiblöck i allne mögliche Forme. Eis vo de gröschte Rich in Indie isch vo Hampi um 1500 us regiärt worde, jetzt chammer d’Ruine, gläge zwüsched saftig grüene Riisfelder, Palme und dere karge Steiwüeschti bewundere, was en ganz bsundere Charme usmacht. Deht hät mich denn nach 4 Täg au min Reisekumpan Flurin verlah, mit ihm hanich dä erscht Monat in Goa verbracht. So, geil, endlich ganz ellei! Scho es rächt komisches Gfühl gsi. Han den aber es super Guesthouse gfunde mit extrem geile Lüüt. Grad 200m weg vo dem Guesthouse hät mer chönne diä Steiblöck erchlättere, „bouldering“ gnännt, was uh vill lüüt deht gmacht händ und ich denn au grad agfange han. Diä nöchschte 4 Täg hani jedä Morge mit chlättere verbracht, am Namitag simmer miteme Velo, wo fascht usenand gheit isch, anen süesswasserstausee gfahre womer hät chöne vo de Felsä is Wasser jumpe, je nach wahl vo 6 bis öppe 16m. Diä ziit isch de Hammer gsi, wenni aber wiiter so usfüehrlich schildere bini morn no drah. Nach Hampi hani 1 Tag d’High-society-stadt Bangalore aglueget, 3 Täg ganz allei in Mysore verbracht (niä nur ein einzige Tourischt gseh, defür umso meh kontäkt mit locals) und bald scho bini in Ooty, enere rächt höch glägne Stadt i de Bergä, umgäh vo einige Nationalpärk, glandet. Vo deht hani au scho wider Fotos. Ich han deht 3 Täg in super Landschafte ime Tribe Village verbracht, de eint hät eus s’dorf zeigt und eus chli i de natur umegfüert. D’Todas läbed inere Symbiose mit Wilde Büffel. D’Büffel lönd sich jedä Tag freiwillig vo de Todas mälke, d’Milch und de Butter isch eis vo de Hauptbestandteil vo ihre Nahrig. Nach Ooty isches in Süde nach Kerala gange, alles hät scho vill fruchtbarer usgseh. Deht haniche Tour uf de Backwaters imene Huusboot gmacht ein Tag. Nachane sind wider Bärge drah gsi, Munnar isch s’Zentrum vo riiesige Teeplantage, ca. 2000m über Meer. Deht häts mich nach de Bärge zoge, mir sind sogar mal verbotenerwis ime gsperrte Nationalpark glandet und hetted fascht de höchscht Bärg südlich vom Himalaya bestige, wänn de Kolleg nöd Problem mitem Fuess gha het. Defür hät eus en Steibock entschädigt, wo bis uf 5m nöchi cho isch und denn gflüchted isch!! Nachdem bini direkt a’d Oschtküschte nach Chennai um mis Ticket nach de Andamane zbsorge, en churze abstächer nach Mammallapuram gmacht (extrem schön glägni Tempel, us solide Steiblöck ghaue) und denn mit de Fähre in 3 Täg 1200km zrugg gleit für 45.-. Uf de Andamane bini zersch uf Little Andaman, fascht kei tourischte, sozäge kei Hotels (nur im hauptort). Ich han deht mit es paar surfers campt für 5 täg. Was füres feeling, mal eifach en strand praktisch für dich ellei zha! Und s’surfe hät mi au extrem agmacht, isch aber zu heavy gsi für afänger. Nachher bini mitere Engländerin zume Lighthouse, es liit 8km entfernt vo jedäre strass, praktisch niämert isch deht, ab und zue en fischer. Deht hämmer es wunderschöns camp gfunde, alles sehr mühevoll igrichted, kei blettär ufem bode und glasklars, türkisblaus wasser. Diä wiitere 5 Täg deht sind eifach fantastisch gsi, wiämer sichs so vorstellt, campe ame einsame strand wiä im paradies!!! De Rescht vo de ziit hani no im Norde verbracht, au praktisch diä ganzi ziit campt, eimal sogar würkli ufere unberüehrte insle (bisch in 20minute um dinsle) für 1 nacht (de fischer hät nöd d’verantwortig für meh Täg wellä, eigentlich hani 5 Nächt vor gha). D’Andamane sind würkli Trauminsle wämer diä richtige Plätz findet. Und touristisch isches no rächt schlächt erschlosse. Wis wiiter gange isch nach de Andamane isch wiiter une zläse!

Surfing

2007-04-20T09:13:00.000+02:00

Jetzt bini au scho wider 10 Täg da in Sri Lanka, han scho einiges an Surferfahrig und gnüss (wieder mal) Beachlife. Surfe isch super asträngend, aber wenn mers denn mal gschafft hät ufem Board zstah und für einigi 10m z'surfe isches eifach es ubeschriblichs Gfühl, vor allem wenn mer grad hinter eme palmegsäumte Sandstrand d'Sunne untergah gseht! Mich häts jedefalls voll packt, diä letschtä beide Täg bini je 5h dusse im Meer gsi, d'Ärm simmer am abig fascht abgheit :O

Jetzt bini bereit zum öppis vom Land gseh. Sri Lanka hät e rächt spannendi Gschicht, prägt durch Invasione vo Südindie und als wichtige Kolonialort (lit direkt a de Hauptroute mitem Schiff vo China nach Arabie). Was mer au guet gfallt isch, dases 70% Buddhischte sind, de Hinduismus vo Indie isch mer langsam chli uf de geischt gange... *gg*

Ich wird mich wider mälde wenn ich vo de Berge zrugg bin!

Sailing to Sri Lanka

2007-04-15T12:05:00.000+02:00

Schlussendlich hämmers doch no gschafft, in Port Blair abzlegä. Nachdem eus de Immigration Officer gseit hät es seg „not possible“ Lüüt ufs Schiff näh hämmer ganz schön blöd glueged...szweite chammer unmöglich sägle und ich han scho mis Ticket cancled. De Kapitän isch denn durch e Travel Agencie zum oberschte Boss vo de ganze Stadt vorgstosse, hät ihn inere Sitzig gstört und euses Problem schildered... de hät nur glached, en telefonaruef gmacht und alles isch in ornig gsi. Indischi Beamti mached eifach wasne grad gfalt..

Am Abig isches los gange... endlich simmer mitem Motor usem Hafe tuckerled und in See gstoche. Jedä vo eus viär hät en viertel vome Tag müese stüüre und ufpasse, min Watch isch vom 3 bis am 6i gsi, am morge und am abig. So hanich jedä Sunneuf- und untergang gseh, was fabelhaf gsi isch! Diä erschtä 3 täg isches total ruhig und windstill gsi, mir händ di ganz ziit de motor brucht (was rächt langwilig isch). Am erschtä tag hämer au euse einzig grosse Fisch gfange, früsch zuebereited ide pfanne ischer super lecker gsi! Au hämmer 3-4 Wal gseh, wiäs mit irne Schwanzflosse is Meer tauched. Delphin händ mir au am erschtä Morge en bsuech abgstatted, sind ca 200m mit schwumme und händ sich ums boot tummled und luftsprüng gmacht :) Au simmer jedä tag go bade, was es total anders erlebniss gsi isch, im bewusstsii, 3000m Wasser unter sich zha (gseh hät mer öppe 30m tüüf). Am 4te Tag häts denn au s’erscht mal en chlinnere sturm gäh (en „Squal“), mir händ eus extreem gfreut nach 3 Mönät trocheheit endlich mal räge! Voll geils gfühl gsi. Au hämmer chöne mitem chlinnere Sägel chli meh tempo übercho. Am nöchschte Tag isches so richtig abgange am Abig, plötzlich hät sich e pächschwarzi Wand vor eus ufbaut. Mir händ s’hauptsägel gsetzt (chnochearbet...*g*) und denn isches au scho los gange. Ich bin am stüür gsi und das isch e totali useforderig worde, sboot öppe 40 Grad gneigt, de Räge hät mer is Gsicht peitscht und nur um de kurs zhalte hani mini ganzi chraft müese ufbringe um gäg de wind azkämpfe! Da hani de Power vo de Natur so richtig chöne gspüüre wänn e böe mit voller chraft gäg d’sägel blase hät. Nach 3 Stund im räge und wind bini total erschöpft gsi am 12i i de nacht, doch mit schlafe isch no nüt gsi. De Kapitän häts stüür übernoh und wil diä andere beide am schlafe gsi sind hanich ihm müese hälfe mit de sägel. Am morge am 3 bini endlich go schlafe, todmüed 12h duregschlafe :-) Wälle häts diä ganzi zit immer rächt grossi gha, so isch mer ständig mit de balance beschäftigt gsi (es hät so richtig fescht gschaukled) und de abwasch hät sich als grossi mission usegstellt (2h arbet). Au s’schlafe bi dem wellegang isch nöd ganz so erholend wiä ufem land, mer muen sich richtig stabilisiere ufem buch oder rugge das mer überhaupt chan ischlafe. Ich han diä ganz zit ufem deck übernachted, mängisch under kristallklarem sternehimmel (endlich isches mal so richtig dunkel gsi deht usse).

Nach 7 super Täg mit de Crew, mit händ vil spass gha, simmer edlich in Galle, Sri Lanka acho. Es Navybot, bestückt mit allerlei Waffe in Gfächtsposition hät eus empfange, eine hät unverständlichs züüg grueffe, und wos wiiteri waffe abdeckt händ isches eus doch chli mulmig zmuet worde. Churz druf hät eine gschroue „Coconut, you want Coconut“ mitere Kokosnuss i de händ. Da isch alles in ordnig gsi, mir händ nur chönne lache.
De erscht Idruck isch super gsi, alles scho sooo grüen, das hät em Herz so richtig guet tah nach 7 Täg nur blauem Meer. S’Land hät dur da a dere Küschte extrem vill Kolonialbaute en spezielle Charme, d’lüüt sind au extrem fründlich und nett, es isch extrem suber und vor allem da a de küschte sind dlüüt au rächt wohlhabend.

Mir händ chöne ines Bungalow wo am Kapitän sine eltere ghört – gratis, direkt am strand in Unawatuna. Jedä abig lauft öppis a de Beach, mer chan Surfe da und s’ässe isch super (und alles extrem tüür für ich). Mini erschtä surfversüech sind au voll geil gsi, extreem astränged aber geils gfühl wänn mer mal e wälle verwütscht hät!! Ich hoff so 2 wuche surfe zchönne und no einehalb wuche mitere gmiätere Rikscha s’land z’erchunde mit de anderne (das isch jedefalls euse plan, das wird voll geil!). Da ich jetzt mini Route total gändered han bini noni so sicher wohi ich söll nachane, momentan gsehts nacheme rückflug nach delhi us und denn möchti uf Ladakh (ganz im norde vo Indie, Himalayaregion mit extrem wenig bewohner) go Trekkä. Nepal mueni villicht uslah will de monsuun bald afangt und d’Treks unbegebahr werded wäg Schnee und Räge.

Gsundheitlich gahts mer bis uf zwei verloreni zehenegel beschtens, ich gnüss es eifach voll uf dere Reis zsii und so vill freiheit zha.

Ich han eine vo mine beide Memory Sticks vo de Kamera verlore, total ärgerlich will 2GB Fotis druff gsi sind :-( Wänni Glück han wirdi per Mail informiärt, han en chläber miteme code undere webadrässe druf womer mich chan finde.

Salüü mitenand

2007-04-02T13:25:00.000+02:00

Nachdem ich mich nöd so mit masse-mails han chöne afründe hanich dänkt ich start en blog für mini reis. isch au besser mit fotos zäme u.s.w...

Joa... jedefalls befind ich mich immer no uf de andamane sit 4 wuche, enere inselgruppe vo 570 Insle zwüsched Indie und Thailand, erscht sit 1990 für tourischte freigäh. Ich han e super ziit hinder mir, han vill ellei oder mit anderne Travellers a einsame Stränd oder uf Insle camped, gschnorchled, g'relaxt und koched (*g*, hät rächt vill ziit brucht jedä tag). Es indisches Festival isch au ganz witzig gsi womer fascht s'gfühl hät mer seg im chriäg wills überall chlöpft und tätscht, d'lüüt devoränned und unglaublich luut musig lauft.

Eigentlich wär mis Schiff zrugg nach Kolkatta am 30 gsi, doch im Hotel häts en Aschlag gha, es sägelschiff suecht es 4ts crewmitglid um nach sri lanka z’sägle, für 20Dollar am Tag. Wiä geil wärs... aber vill ztüür und nöd uf minere Route. 10 Minute bevor ich han wellä gah am 30te isch eine vo de crew cho und hät eus gseit si wänd kei 20Dollar meh wil si dringed eine bruched zum sägle. Nach wiitere 10 minute isch für mich klar gsi, diä eimalig chance muenich nutze. So bini mis Ticked go cancle (erstunlich schnäll für indischi verhältniss undere schlnage vo 50 lüüt vorem schalter, aber wilich so gstresst han häts den doch klappt) und am nöchschte tag bini scho ufem boot gsi, emene 15m lange sägelschiff, top usgrüschted für zu sägle rund um d’welt. De Skipper isch scho 5 Jahr unterwegs mitem, diä anere sind au backpacker wiänich und extrem netti lüüt (endlich kifft mal niämert*gg*). Doch es isch grad en heilige Tag gsi und s’Immigration Office hät zuegha, so hämmer wiiteri 2 täg müese warte. Hüt im Office hät eus eine klar gmacht, dass s’schjiff kä ander Mitglide dörf ufnäh, das heisst mich und en Pol wo au ersch druff cho isch uf de Andamane. Oh schreck.... was jetzt?? Ander schiff händs aber au scho gmacht, mir sind jetzt da jedefalls gstrandet will s’zweite chammers boot nöd sägle, mir müend uf das schiff chöne. Es wär jedefalls e unglaublichi erfahrig.

Mini Route wonich am Afang so im Chopf gha han isch jedefalls voll verändered, und jetzt fühlt sichs vill meh wiänes abentüür ahwämer nöd gnau weis wohii dases gaht und obs klappt, eifach gah wohis eim triibt...

ich hoffe bald mal wider schribe zchönne am liäbschte vo Sri Lanka wenns bald klappt, en huufe fotos wirdi au no uploade (funktioniert da irgendwiä nöd...).

Süscht gahts mer bis ufen verstuchte Zehe beschtens, ich gnüsses eifach unglaublich, allei so frei i dere wiite Wält zsii und mache wasi grad luscht han druff. Es isch de richtig entscheid gsi, ellei zreise, mer macht so vill bekanntschafte, villicht nurein abig oder grad e ganzi wuche. D'travellers da in Indie sind au voll interessant will indie wiä en filter würkt und alli blöde lüüt filtered.. *gg*.

ganz liäbi grüäss zrugg i'd Schwiiz (isch übrigens es unglaublich schöns land... nur so näbebii)
peace
Aurelian