Rückblick - endlich Pictures!

	Endlich hanis gschafft, Fotis uezlade. Ei ganzi DVD hanich scho heigschickt (drum kei Fotis meh verfüegbar) und wiiteri 2GB hani verlore, doch ich han eifach mal es paar ufeglade. Thjo wo sölli afange? So wiän ich mich no chan erinnere hanichmis letschtä Mail irgendwo vo Goa us gschribe. Nach Goa bini uf Hampi, es rächt chlises defür umso heiligers Stettli im Härze vo Indie, umgäh vo riesige Steiblöck i allne mögliche Forme. Eis vo de gröschte Rich in Indie isch vo Hampi um 1500 us regiärt worde, jetzt chammer d’Ruine, gläge zwüsched saftig grüene Riisfelder, Palme und dere karge Steiwüeschti bewundere, was en ganz bsundere Charme usmacht. Deht hät mich denn nach 4 Täg au min Reisekumpan Flurin verlah, mit ihm hanich dä erscht Monat in Goa verbracht. So, geil, endlich ganz ellei! Scho es rächt komisches Gfühl gsi. Han den aber es super Guesthouse gfunde mit extrem geile Lüüt. Grad 200m weg vo dem Guesthouse hät mer chönne diä Steiblöck erchlättere, „bouldering“ gnännt, was uh vill lüüt deht gmacht händ und ich denn au grad agfange han. Diä nöchschte 4 Täg hani jedä Morge mit chlättere verbracht, am Namitag simmer miteme Velo, wo fascht usenand gheit isch, anen süesswasserstausee gfahre womer hät chöne vo de Felsä is Wasser jumpe, je nach wahl vo 6 bis öppe 16m. Diä ziit isch de Hammer gsi, wenni aber wiiter so usfüehrlich schildere bini morn no drah. Nach Hampi hani 1 Tag d’High-society-stadt Bangalore aglueget, 3 Täg ganz allei in Mysore verbracht (niä nur ein einzige Tourischt gseh, defür umso meh kontäkt mit locals) und bald scho bini in Ooty, enere rächt höch glägne Stadt i de Bergä, umgäh vo einige Nationalpärk, glandet. Vo deht hani au scho wider Fotos. Ich han deht 3 Täg in super Landschafte ime Tribe Village verbracht, de eint hät eus s’dorf zeigt und eus chli i de natur umegfüert. D’Todas läbed inere Symbiose mit Wilde Büffel. D’Büffel lönd sich jedä Tag freiwillig vo de Todas mälke, d’Milch und de Butter isch eis vo de Hauptbestandteil vo ihre Nahrig. Nach Ooty isches in Süde nach Kerala gange, alles hät scho vill fruchtbarer usgseh. Deht haniche Tour uf de Backwaters imene Huusboot gmacht ein Tag. Nachane sind wider Bärge drah gsi, Munnar isch s’Zentrum vo riiesige Teeplantage, ca. 2000m über Meer. Deht häts mich nach de Bärge zoge, mir sind sogar mal verbotenerwis ime gsperrte Nationalpark glandet und hetted fascht de höchscht Bärg südlich vom Himalaya bestige, wänn de Kolleg nöd Problem mitem Fuess gha het. Defür hät eus en Steibock entschädigt, wo bis uf 5m nöchi cho isch und denn gflüchted isch!! Nachdem bini direkt a’d Oschtküschte nach Chennai um mis Ticket nach de Andamane zbsorge, en churze abstächer nach Mammallapuram gmacht (extrem schön glägni Tempel, us solide Steiblöck ghaue) und denn mit de Fähre in 3 Täg 1200km zrugg gleit für 45.-. Uf de Andamane bini zersch uf Little Andaman, fascht kei tourischte, sozäge kei Hotels (nur im hauptort). Ich han deht mit es paar surfers campt für 5 täg. Was füres feeling, mal eifach en strand praktisch für dich ellei zha! Und s’surfe hät mi au extrem agmacht, isch aber zu heavy gsi für afänger. Nachher bini mitere Engländerin zume Lighthouse, es liit 8km entfernt vo jedäre strass, praktisch niämert isch deht, ab und zue en fischer. Deht hämmer es wunderschöns camp gfunde, alles sehr mühevoll igrichted, kei blettär ufem bode und glasklars, türkisblaus wasser. Diä wiitere 5 Täg deht sind eifach fantastisch gsi, wiämer sichs so vorstellt, campe ame einsame strand wiä im paradies!!! De Rescht vo de ziit hani no im Norde verbracht, au praktisch diä ganzi ziit campt, eimal sogar würkli ufere unberüehrte insle (bisch in 20minute um dinsle) für 1 nacht (de fischer hät nöd d’verantwortig für meh Täg wellä, eigentlich hani 5 Nächt vor gha). D’Andamane sind würkli Trauminsle wämer diä richtige Plätz findet. Und touristisch isches no rächt schlächt erschlosse. Wis wiiter gange isch nach de Andamane isch wiiter une zläse!

Surfing

Jetzt bini au scho wider 10 Täg da in Sri Lanka, han scho einiges an Surferfahrig und gnüss (wieder mal) Beachlife. Surfe isch super asträngend, aber wenn mers denn mal gschafft hät ufem Board zstah und für einigi 10m z'surfe isches eifach es ubeschriblichs Gfühl, vor allem wenn mer grad hinter eme palmegsäumte Sandstrand d'Sunne untergah gseht! Mich häts jedefalls voll packt, diä letschtä beide Täg bini je 5h dusse im Meer gsi, d'Ärm simmer am abig fascht abgheit :O

Jetzt bini bereit zum öppis vom Land gseh. Sri Lanka hät e rächt spannendi Gschicht, prägt durch Invasione vo Südindie und als wichtige Kolonialort (lit direkt a de Hauptroute mitem Schiff vo China nach Arabie). Was mer au guet gfallt isch, dases 70% Buddhischte sind, de Hinduismus vo Indie isch mer langsam chli uf de geischt gange... *gg*

Ich wird mich wider mälde wenn ich vo de Berge zrugg bin!

Sailing to Sri Lanka

Schlussendlich hämmers doch no gschafft, in Port Blair abzlegä. Nachdem eus de Immigration Officer gseit hät es seg „not possible“ Lüüt ufs Schiff näh hämmer ganz schön blöd glueged...szweite chammer unmöglich sägle und ich han scho mis Ticket cancled. De Kapitän isch denn durch e Travel Agencie zum oberschte Boss vo de ganze Stadt vorgstosse, hät ihn inere Sitzig gstört und euses Problem schildered... de hät nur glached, en telefonaruef gmacht und alles isch in ornig gsi. Indischi Beamti mached eifach wasne grad gfalt..

Am Abig isches los gange... endlich simmer mitem Motor usem Hafe tuckerled und in See gstoche. Jedä vo eus viär hät en viertel vome Tag müese stüüre und ufpasse, min Watch isch vom 3 bis am 6i gsi, am morge und am abig. So hanich jedä Sunneuf- und untergang gseh, was fabelhaf gsi isch! Diä erschtä 3 täg isches total ruhig und windstill gsi, mir händ di ganz ziit de motor brucht (was rächt langwilig isch). Am erschtä tag hämer au euse einzig grosse Fisch gfange, früsch zuebereited ide pfanne ischer super lecker gsi! Au hämmer 3-4 Wal gseh, wiäs mit irne Schwanzflosse is Meer tauched. Delphin händ mir au am erschtä Morge en bsuech abgstatted, sind ca 200m mit schwumme und händ sich ums boot tummled und luftsprüng gmacht :) Au simmer jedä tag go bade, was es total anders erlebniss gsi isch, im bewusstsii, 3000m Wasser unter sich zha (gseh hät mer öppe 30m tüüf). Am 4te Tag häts denn au s’erscht mal en chlinnere sturm gäh (en „Squal“), mir händ eus extreem gfreut nach 3 Mönät trocheheit endlich mal räge! Voll geils gfühl gsi. Au hämmer chöne mitem chlinnere Sägel chli meh tempo übercho. Am nöchschte Tag isches so richtig abgange am Abig, plötzlich hät sich e pächschwarzi Wand vor eus ufbaut. Mir händ s’hauptsägel gsetzt (chnochearbet...*g*) und denn isches au scho los gange. Ich bin am stüür gsi und das isch e totali useforderig worde, sboot öppe 40 Grad gneigt, de Räge hät mer is Gsicht peitscht und nur um de kurs zhalte hani mini ganzi chraft müese ufbringe um gäg de wind azkämpfe! Da hani de Power vo de Natur so richtig chöne gspüüre wänn e böe mit voller chraft gäg d’sägel blase hät. Nach 3 Stund im räge und wind bini total erschöpft gsi am 12i i de nacht, doch mit schlafe isch no nüt gsi. De Kapitän häts stüür übernoh und wil diä andere beide am schlafe gsi sind hanich ihm müese hälfe mit de sägel. Am morge am 3 bini endlich go schlafe, todmüed 12h duregschlafe :-) Wälle häts diä ganzi zit immer rächt grossi gha, so isch mer ständig mit de balance beschäftigt gsi (es hät so richtig fescht gschaukled) und de abwasch hät sich als grossi mission usegstellt (2h arbet). Au s’schlafe bi dem wellegang isch nöd ganz so erholend wiä ufem land, mer muen sich richtig stabilisiere ufem buch oder rugge das mer überhaupt chan ischlafe. Ich han diä ganz zit ufem deck übernachted, mängisch under kristallklarem sternehimmel (endlich isches mal so richtig dunkel gsi deht usse).

Nach 7 super Täg mit de Crew, mit händ vil spass gha, simmer edlich in Galle, Sri Lanka acho. Es Navybot, bestückt mit allerlei Waffe in Gfächtsposition hät eus empfange, eine hät unverständlichs züüg grueffe, und wos wiiteri waffe abdeckt händ isches eus doch chli mulmig zmuet worde. Churz druf hät eine gschroue „Coconut, you want Coconut“ mitere Kokosnuss i de händ. Da isch alles in ordnig gsi, mir händ nur chönne lache.
De erscht Idruck isch super gsi, alles scho sooo grüen, das hät em Herz so richtig guet tah nach 7 Täg nur blauem Meer. S’Land hät dur da a dere Küschte extrem vill Kolonialbaute en spezielle Charme, d’lüüt sind au extrem fründlich und nett, es isch extrem suber und vor allem da a de küschte sind dlüüt au rächt wohlhabend.

Mir händ chöne ines Bungalow wo am Kapitän sine eltere ghört – gratis, direkt am strand in Unawatuna. Jedä abig lauft öppis a de Beach, mer chan Surfe da und s’ässe isch super (und alles extrem tüür für ich). Mini erschtä surfversüech sind au voll geil gsi, extreem astränged aber geils gfühl wänn mer mal e wälle verwütscht hät!! Ich hoff so 2 wuche surfe zchönne und no einehalb wuche mitere gmiätere Rikscha s’land z’erchunde mit de anderne (das isch jedefalls euse plan, das wird voll geil!). Da ich jetzt mini Route total gändered han bini noni so sicher wohi ich söll nachane, momentan gsehts nacheme rückflug nach delhi us und denn möchti uf Ladakh (ganz im norde vo Indie, Himalayaregion mit extrem wenig bewohner) go Trekkä. Nepal mueni villicht uslah will de monsuun bald afangt und d’Treks unbegebahr werded wäg Schnee und Räge.

Gsundheitlich gahts mer bis uf zwei verloreni zehenegel beschtens, ich gnüss es eifach voll uf dere Reis zsii und so vill freiheit zha.

Ich han eine vo mine beide Memory Sticks vo de Kamera verlore, total ärgerlich will 2GB Fotis druff gsi sind :-( Wänni Glück han wirdi per Mail informiärt, han en chläber miteme code undere webadrässe druf womer mich chan finde.

Salüü mitenand

Nachdem ich mich nöd so mit masse-mails han chöne afründe hanich dänkt ich start en blog für mini reis. isch au besser mit fotos zäme u.s.w...

Joa... jedefalls befind ich mich immer no uf de andamane sit 4 wuche, enere inselgruppe vo 570 Insle zwüsched Indie und Thailand, erscht sit 1990 für tourischte freigäh. Ich han e super ziit hinder mir, han vill ellei oder mit anderne Travellers a einsame Stränd oder uf Insle camped, gschnorchled, g'relaxt und koched (*g*, hät rächt vill ziit brucht jedä tag). Es indisches Festival isch au ganz witzig gsi womer fascht s'gfühl hät mer seg im chriäg wills überall chlöpft und tätscht, d'lüüt devoränned und unglaublich luut musig lauft.

Eigentlich wär mis Schiff zrugg nach Kolkatta am 30 gsi, doch im Hotel häts en Aschlag gha, es sägelschiff suecht es 4ts crewmitglid um nach sri lanka z’sägle, für 20Dollar am Tag. Wiä geil wärs... aber vill ztüür und nöd uf minere Route. 10 Minute bevor ich han wellä gah am 30te isch eine vo de crew cho und hät eus gseit si wänd kei 20Dollar meh wil si dringed eine bruched zum sägle. Nach wiitere 10 minute isch für mich klar gsi, diä eimalig chance muenich nutze. So bini mis Ticked go cancle (erstunlich schnäll für indischi verhältniss undere schlnage vo 50 lüüt vorem schalter, aber wilich so gstresst han häts den doch klappt) und am nöchschte tag bini scho ufem boot gsi, emene 15m lange sägelschiff, top usgrüschted für zu sägle rund um d’welt. De Skipper isch scho 5 Jahr unterwegs mitem, diä anere sind au backpacker wiänich und extrem netti lüüt (endlich kifft mal niämert*gg*). Doch es isch grad en heilige Tag gsi und s’Immigration Office hät zuegha, so hämmer wiiteri 2 täg müese warte. Hüt im Office hät eus eine klar gmacht, dass s’schjiff kä ander Mitglide dörf ufnäh, das heisst mich und en Pol wo au ersch druff cho isch uf de Andamane. Oh schreck.... was jetzt?? Ander schiff händs aber au scho gmacht, mir sind jetzt da jedefalls gstrandet will s’zweite chammers boot nöd sägle, mir müend uf das schiff chöne. Es wär jedefalls e unglaublichi erfahrig.

Mini Route wonich am Afang so im Chopf gha han isch jedefalls voll verändered, und jetzt fühlt sichs vill meh wiänes abentüür ahwämer nöd gnau weis wohii dases gaht und obs klappt, eifach gah wohis eim triibt...

ich hoffe bald mal wider schribe zchönne am liäbschte vo Sri Lanka wenns bald klappt, en huufe fotos wirdi au no uploade (funktioniert da irgendwiä nöd...).

Süscht gahts mer bis ufen verstuchte Zehe beschtens, ich gnüsses eifach unglaublich, allei so frei i dere wiite Wält zsii und mache wasi grad luscht han druff. Es isch de richtig entscheid gsi, ellei zreise, mer macht so vill bekanntschafte, villicht nurein abig oder grad e ganzi wuche. D'travellers da in Indie sind au voll interessant will indie wiä en filter würkt und alli blöde lüüt filtered.. *gg*.

ganz liäbi grüäss zrugg i'd Schwiiz (isch übrigens es unglaublich schöns land... nur so näbebii)
peace
Aurelian